దశాబ్దాల చరిత గల
ఉస్మానియా వర్సిటీ
రారమ్మని చదివేందుకు
కబురు పంపుతున్నది..
చాణక్యులనందించిన
చదువులమ్మ తన ఒడికి
ఉద్యమమై రావాలని
చెయులు చాచుతున్నది
డిగ్రీ చదివితే చాలదు..
మార్కులుంటె సరిపోదు..
పుస్తకాల పురుగులు
కులాసాల మనుషులు
పిడికిలెత్తగలిగితేనే
పరుగున రమ్మంటున్నది
భోజనంలో రాళ్లు, రప్పలు
మోయలేని మెస్ బిల్లులు
అటెండెన్సు గొడవలు
యూనియన్ల తగవులు
దిష్టిబొమ్మ దహనాలు
చేతనైతె ధర్నాలు
దడపుట్టే దరువులు
బతుకుదారి చూపేందుకు
బహుచక్కని నేస్తాలని..
పోలీసులు మీ దోస్తీ
బాష్పవాయుతో కుస్తీ
శాంతికపోతాల సుస్తీ
మీ కోపం రాజేస్తే..
రోడ్డంతా రాళ్లవాన,
కమిలేలా లాఠీమామ
నిత్య యుద్ధక్షేత్రంలో
బొంగురుపోయె గొంతులు
నొప్పెట్టే చేతులు
సర్కారు కుట్రలు
రాజకీయ రగడలు
పాఠం నేర్పేందుకివి
భలేభలే సందర్భాలు
చదువంటే ఇదేఇదే
నిత్యసమరనాదం
ఖాకీలతో, తూటాలతో
సదా సాన్నిహిత్యం
భయమేస్తోందా బిడ్డా
సల్లదాగి నిండపడుకో
కాళ్లురెక్కలు మంచిగుంటె
కూలిపనికి పోయి బతుకు
రక్తం ఉరకలు వేస్తే
ఉస్మానియాకు పరుగెత్తు
చరిత్ర తిరగేస్తూనే
కొత్త చరిత సృష్టించు
రాబోయే తరాలకు
నీవే ఒక పాఠమవ్వు
-చందనం శ్రీకాంత్
బొమ్మ: అక్బర్